فـ الحب ♥

الحب
شعور جميل ما يتوصفش 
احنا عايشين حياتنا فـ حب 
احنا بنتنفس حب 
بنحب ربنا فبنعمل كل ما يأمرنا به من الطاعات وبنبعد عن كل ما لا يرضيه وينهانا عنه وهى دى العبادة 
بنحب الرسول فبنقتدى به و نعمل بهديه وسنته 
بنحب عيلتنا واصحابنا و كل الى حوالينا 
بنحب ناس لله فـ لله مش عايزين منهم لا مال ولا جاه ولا اى حاجة غير ربنا يجمعنا بيهم فـ جنته فبناخد بايديهم و ننصحهم فـ الله و نوجههم للصح ونشجعهم عـ الطاعة و نبعدهم عن المعصية  
وبنعمل كل حاجة معاهم بنية(انا بعمل كل دة فـ الله) 
ودة اسمه الاخوة فـ الله والحب فـ الله هو اسمى انواع الحب عـ الاطلاق 
وفـ نوع من انواع الحب 
اللى كلنا بنبحث عنه ونفسنا فيه 
واللى هو الحب الحلال 
الحب اللى بيبتدى ب(هو) اعجب بيها ومش عارف ايه السبب حاسس بحاجة بتشده ليها شايفها زوجة صالحة وام لاولاده فـ المستقبل 
فيبتدى يعف نفسه عنها و ميحاولش يكلمها ولا يشغلها ويكافح ويحوش كل قرش يكسبه فـ الحلال علشان يبقى مستعد بتكاليف الزواج ويدعيلها فـ صلاته تكون من نصيبه وان ربنا يحفظها من كل شر او سوء 
ولما يبقى جاهز لتحمل المسئولية وتكاليف الزواج يجرى اوام يتقدملها فـ بيت اهلها  
و(هى) فـ الحالة دى تشوفه فعلا انسان يستحقها اصله حافظ عليها وعـ قلبها وشايفاه زوج صالح و ابو عيالها اللى هتقدر تبنى حياتها معاه فـ حب ورضا الله  
احيانا من كتر ما (هو)معجب بيها اوى اوى مش قادر يخبى فـ قلبه خايف ال ايه لتضيع منه (ونسى ان ربنا هو القادر عـ ان يؤلف بين القلوب) فيعترفلها بحبه ليها 
و(هى) كائن ضعيف محتاج دايما الاهتمام فمبتصدق انه تلاقيه فـ شخص بيحبها 
ويبتدى بقى الموضوع باعجاب وكلام و همسات وتعلق القلب 
ودة اللى بنسميه الارتباط الغير رسمى ودة حرام وفيه غضب من ربنا 
وفـ الاخر بيحصل انفصال (ماحنا قلنا ربنا هو القادر عـ ان يؤلف بين القلوب ازاى هيؤلف بين قلوبكم وانتم بتعصوه) 
يحصل اما انهم يعرفوا انه حرام بس لسه بيحبوا بعض وبيسيب غصة فـ القلب لانهم نفسهم ربنا يجمعهم فـ الحلال وقد لا يجمعهم (لحكمه يعلمها هو وحده سبحانه ودى انا شوفتها كتير اوى اوى) 
او انهم يكتشفوا انهم مينفعوش لبعض وللاسف دة بيسيب فـ البنت اثر نفسى سىء تتمنى لو انه محصلش كل دة وانها لو كانت تقدر تحافظ عـ قلبها ومتفتحوش قبل اوانه
 
و(هو) ليه يقولها انه بيحبها مش قادر يعف نفسه ليه 
ليه مقدرش يبتعد عنها و ميشغلهاش بحبه دة 
لو كان بيحبها بجد مكنتش استعجل واعترف بحبه ليها 
(من تعجل بشىء قبل اوانه عوقب بحرمانه) 
و(هى) ليه تضعف قدام حبه 
ليه تخون ثقة اهلها وتكلمه 
ليه ترخصى نفسك معاه 
لو كان بيحبك مكانش رضى باللى ميرضاهوش عـ اخواته 
(من تعجل بشىء قبل اوانه عوقب بحرمانه) 
تعرفوا بقى ان انتم الانتين غلطوا 
انا مش باقولكم كدة علشان افكرهم انكم عصيتوا ربنا وتأنيب النفس 
بس ربنا لسه بيديكوا فرصه 
انكم تصححوا المسار الغلط 
انكم ترجعوا لربنا وحبه ♥
لو لسه بتحبوا بعض ادعوا لبعض ان ربنا يجمعكم بالحلال (هو القادر عـ ان يؤلف بين قلوبكم) ♥
عـ فكرة الحب مش انكم تكلموا بعض الحب اللى بجد دعوة حلوة فـ جوف الليل ♥
واصبروا وخلوا الصبر ملزمكم ^_^
وربنا يجمعكم بالحلال باذنه لو كان خير ليكم ♥ ^_^
يلا كل واحد منكم يقوم دلوقتى يصلى ركعتين و يفضفض فـ سجوده ويكلم ربنا عن الشخص اللى بيحبه ويدعيله بالخير وان ربنا يجمعه بالتانى فـ الحلال ♥
#عيشوها_صح
#ارجعوا_لربنا

**************************************************************************************************************************

#تعرف_يا_اسمك_ايه <3

لما بنجح فشغلى والكل يثنى عليا ويقولولى الله يوفقك والله يفتح عليكى ^_^

ببقى مبسوطة من جوايا طبيعى كل واحد بيبقى نفسه يكون ناجح فشغله :D 3:)

بس ساعتها بفكر فيك واقول تلاقيه هو كمان ناجح فشغله وربنا موفقه فحياته العمليه ^_^

اصل احنا الاتنين مبنبطلش دعا لبعض ان ربنا يوفقنا فحياتنا <3

#تعرف_يا_اسمك_ايه <3

لما ببقى مبسوطة اوى من جوايا والابتسامة بتنطق من عينيا :D

اقعد افكر واقول تلاقيه هو كمان مبسوط زيي وفرحان :D

اصل احنا الاتنين مبنبطلش دعا لبعض ان ربنا يرزقنا الخير حيث كان ثم يرضينا به <3

#تعرف_يا_اسمك_ايه <3

لما اى حد يسألنى و يقولى مش هنفرح بيكى قريب :D

بقولهم قريب ان شاء الله تفرحوا بيا :v

واسرح واقول انا عارفة انت متأخر عنى ليه ^_^

ربنا استجاب لدعوتى اللى دعيتها انك تفضل بعيد عنى لغاية ما تبقى صالح <3

واكييد انت كمان بتدعى ان افضل بعيدة عنك لغاية اما ابقى صالحة <3

#تعرف_يا_اسمك_ايه <3

انا مش زعلانة انى بعيدة عنك وانك بعيد عنى :) :)

لان عندى يقين ان ربنا هيجمعنا ببعض ^_^

لما نكون احنا الاتنين اتهيأنا اننا نكون زوج وزوجه صالحين <3

علشان نبنى حياتنا عطاعة الله ورضاه ^_^

وساعتها هقول لكل حد سألنى عنك :D

انك بقيت معايا <3

بقيت حلالى <3

بقيت بابتى واخويا وابنى وزوجى وحبيبى وكل دنيتى <3

ربنا يجمعنا ببعض عاجلا غير اجلا ^_^ <3

#رسالة_لزوجى_المستقبلى

*****************************************************************

الحب الحلال
عفة فـ القلب
دعاء فى جوف الليل
صبر وكفاح ليل ونهار
حمايتها من نفسك
دبلة منورة فـ ايديها 

********************************************************************************

كل فتاة أميرة فـ نظر احدهم   

********************************************************************************

انا باحلم بزوج صالح 
يعيننى عـ الطاعة و ياخذ بيدى للجنة 
اعتمد عليه فـ كل حاجة وينصحنى ويوجهنى للصح 
رخم اه بس رخامته من حبه ليا مش لتناكته عليا 
شهر العسل بتاعنا يبقى فـ مكة علشان نعمل عمرة او حج 
يصلى فـ المسجد ولما يخلص صلاة يجرى عليا ويمسك ايديا ويسبح عليها و يقولى علشان تشاركيى فـ الاجر والثواب 
نتنافس مع بعض مين يختم القران قبل التانى نحفز بعض ونعمل زى حاجة تشجيعية للى يسبق التانى وتبقى المنافسة شديدة اه بس بابقى فرحانة اوى 
يساعدنى فـ شغل البيت علشان يقتدى بالرسول فـ مساعدته لزوجاته 
وكل ما ادخل عليه الاقيه ماسك عيالنا بيحفظهم قران 
ولو فـ يوم تعبت ونمت وجت وقت قيام الليل او الفجر يصحينى ويمسك ايدى بحب و يقولى علشان متقليش عنى فـ الثواب 
كل ما الدنيا تضغط عليا واتعصب يقول (رب اغفر لها ذنبها) مش يتعصب عليا بزيادة 
علشان كدة انا صابرة و متأكدة انى هلاقيه 
اصل دى ثقتى بربى وحسن ظنى به ووعده بان (الطيبون للطيبات)  
#لزوجى_المستقبلى

***************************************************************************

كل ما اتمناه فـ هذة الدنيا
أنا و أنت وبنوتة جميلة تشبهك  

**************************************************************************

هو وهى بعد كتب الكتاب
هى : احم ممكن اسألك عـ حاجة 
هو : يا سلام اامرى يا حياتى 
هى : هو مش النهاردة الجمعة 
هو : ايون 
هى: طيب قريت الكهف 
هو : لا لسه 
هى : طيب ممكن نقراها مع بعض علشان دى تبقى اول طاعة نعملها مع بعض بعد كتب كتابنا 
هو : تصدقى بالله انا كنت مستنى انا كمان نقراها مع بعض بعد كتب الكتاب لانى كنت باحلم ان اعمل اول طاعة معاكى بعد كتب الكتاب  
هى : بس انا ليا شرط تقراها بصوتك الاول عايزة اسمع صوت تلاوتك للقران وبعد كدة نقراها مع بعضنا 
هو : ياذن الله 
الحمد لله الذى رزقنى زوجة صالحة تعيننى عـ الطاعة 
هى : احم احم الحمد لله الذى رزقنى زوج صالح يعيننى عـ الطاعة 

******************************************************************************

انا قلبى ملك انسان واحد وبس
واحد هيكون لى ابويا واخويا وابنى و زوجى و حبيبى 
واحد اعرف اعتمد عليه يكون حنين وغيوووور اوووى وصعب وطيب ومجنوون وعاقل 
واحد ينفع يربى ولادى يكون حنين عليهم اووى 
واحد هيوجهنى للصح فـ كل حياتى و ينصحنى 
واحد يعينى عـ الطاعة علشان ربنا يجمعنا فـ الجنة مع بعض زى ما جمعنا فـ دنيته 
من الاخر واحد قدوته الرسول 
يارب عينه على الطاعة ويكون بيصلى التراويح ومش بيكسل ياارب وعنى انا كمان يارب 
يارب يكون بيدعيلى فى رمضان انك تجمعنى بيه قريبا 
ويارب اجمع بينا عاجلا غير اجلا وفرح قلبنا احنا الاثنين بتلاقى بحلالك يارب 
اصل حياتى فاضيه من غيرك 
بس نصيحة من دلوقتى
انا غيرتى عليك قاتله جدا 
عارف لو شوفتك بتتعاكس عـ النت وواحدة كتبتلك فـ كومنت(انت شخصية حلوة اوى يا رب يرزقنى بواحد زيك)ولا لقيت واحدة بتمدحك قدامى عـ ارض الواقع اعتبر نفسك فـ عداد الاموات 
زى ما بتغير عليا قيراط انا بغير 24 
بحبك يا  انا 

***************************************************************************

عارفين
انا بحب زوجى المستقبلى جدا جدا 
وحاسة بحبى ليه 
بحبه من قبل ما اشوفه 
من قبل ما اعرف هو مييين 
من قبل ما اعرف اراضيه فين وبيعمل ايه دلوقتى 
عارفين
انا بادعيله من قلبى وباقول 
(ياااااااااا رب لو كان لسه مش صالح خليه بعيد عنى لغاية ما يهتدى ويبقى صالح ولو بقى صالح قربه ليا وخليه يتقدملى بسرعة وانا هاوافق عليه بكل ظروفه)  
بس تعرف يا  قلبى 
انا غيرتى عليك قاتله جدا 
عارف لو شوفتك بتتعاكس عـ النت وواحدة كتبتلك فـ كومنت(انت شخصية حلوة اوى يا رب يرزقنى بواحد زيك)ولا لقيت واحدة بتمدحك قدامى عـ ارض الواقع اعتبر نفسك فـ عداد الاموات 
زى ما بتغير عليا قيراط انا بغير 24 
انا هاعمل فيك عمايل هاوريك النجوم فـ عز الضهر بما انك سايبنى عمالة اكلم فـ نفسى 
بس تعرف برضوا انا عارفة انك هتصالحنى وهتجيبلى ورد وشيكولاتةوتقولى اسف جدا سامحينى كنت لسه مش مستعد علشان اخد الجوهرة الغالية دى من بيت باباها 
وابقى فرحانة اوى اوى وانا باسمع الكلام دة اصل انا هبلة ومعجونة بحبك  
بحبك يا  انا 

**************************************************************************

يوما ما
هيأذن ربنا بانك تكون ليا واكون ليك
وهيحتفل العالم كله بزواجنا المبارك
وبما انى صابرة وعفيفة
عايزاك يا  انا  تكون صابر وعفيف
علشان  الطيبون للطيبات 
ها متفقين 
#همسة_لزوجى_المستقبلى

***********************************************************************

وهى البنت عايزة ايه
غير زوج يحبها ويحتويها 
ويرعاها فـ الله ويصونها 
ويكون ابوها واخوها وابنها  

*****************************************************************************

وفـ نهاية رمضان
افتكرت ذكرياتنا مع بعض فيه
 لما كنت بتساعدنى فـ تحضير الفطار وتقولى معقولة اشوف بنوتى حبيبتى صايمة وتعبانة فـ تجهيز الفطار ومساعدهاش دى تبقى حتى عيب فـ رجولتى وعلشان كمان اقتدى بالرسول (صلى الله عليه وسلم) فـ مساعدته لزوجاته 
 لما كنت باتعب واروح فـ النوم بعد صلاة التراويح ويجى وقت صلاة التجهد فتصحينى بحماس وتقولى علشان متقليش عنى فـ الثواب وبعد
ما نخلص صلاة نتسحر مع بعض ونقرا القران لغاية الفجر ونصليه 
 بعد ما بندعى دعاء الافطار وندعى بما نشاء و نفطر عـ تمرات سنه عن النبى (صلى الله عليه وسلم) تروح ماسك ايدى و تبصلى بابتسامة وتقولى ياااا رب اكون سبب فـ اسعادك طول عمرى 
 كنا بنتسابق مين يختم القران اكتر من مرة وبتبقى المنافسة شديدة جدا بس كنت بابقى فرحانة انك بتجتهد معايا فـ ختمه اكتر من مرة 
 لما كنا بنروح نصلى التراويح مع بعض انا مع البنات وانت مع الشباب كنت بادعيلك فـ كل سجدة ان ربنا يجمعنا فـ جنته زى ما جمعنا فـ دنيته 
 بعد ما تخلص صلاة فـ المسجد تروح تجرى وتمسك ايدى وتسبح عليها وتقولى علشان تشاركينى الاجر والثواب^_^
النهاردة الفرحة كبيرة اوى اوى 
علشان دة اول عيد نقضيه مع بعض 
كل عام ونحن الى الله اقرب  
وفرحانه جدا اننا هنصلى العيد مع بعض 
بس بعد الصلاة
تفسحنى وتجيبلى بلالين وغزل البنات وشيكولاتة 
مهو انا بنوتك الدلوعة بقى يا بابتى 
و هتجيب لنفسك صواريخ وتقوم تضربها 
مهو انت كمان طفلى المدلل اللى بعشقه  
بحبك يا  أنا 

*****************************************************************************************************************************

وفـ اخر يوم من رمضان 
بادعى واقول
(يااااااا رب العام القادم نصلى صلاة العيد مع بعض)  
بس بعد الصلاة ان شاء الله 
تفسحنى وتجبلى بلالين وغزل البنات 
مهو انا بنوتك الدلوعة يا بابتى  
ولا ايه 
بحبك يا  أنا